GHPM

Pinzellati

‘Il fuq u l’isfel mal-mixja taż-żmien,
ħfief u safja
tarahom kullimkien.
Iserpu ‘tul kwadru tal-ħajja bla tmiem,
jonfħu bla heda
n-nifs dejjiem.
Jitbewsu bil-ħerqa
mal-mewġ żeffien,
daqqiet oħra jbikku-
suwed l-ilwien.
Iż-żebgħa li tnixxi
titkellem bla kliem,
tferraħ u tnessi
f’ żerniq il-jiem.

Pinzellati f’moħħ esseri ħajjin,
qatt ma jiċċaraw-qatt m’huma mejtin.

FJURA

Mal-medda tax-xmara,

Kibru qrib żewġ fjuri żgħar.

Qalb ħaxix kbir tara

Ħdura tħaddar il-madwar.

Jien fjura,

Inti fjura,

Flimkien negħlbu l-ħdura

U ngħixu ħajja hienja.

FIL-BANJU TAN-NANNA

Fil-banju tan-nanna kont inċafċaf,

kont nilgħab bla serħan

u bla waqfien,

bla nkwiet ta’ xejn fuq dak li għadu ġej.

Hi tmellisni u tiċċajta.

F’għajnejha kont nilmaħ l-imħabba,

il-qalb tat-tieni omm.

Bit-tjubija,

tarani nindaf minn dawk il-ħwejjeġ

li qatt ma tebbgħuni

għax kont żgħira.

Leanne Ellul

Leanne Ellul twieldet fis-sena 1989 u toqgħod Ħal Luqa. Studjat ġewwa l-iskola primarja u sekondarja ta’ l-Immakulata Kunċizzjoni f’Ħal Tarxien. Wara attendiet il-Kulleġġ post sekondarju, De La Salle. Illum il-ġurnata qiegħda tistudja l-lingwa Maltija flimkien mas-Soċjoloġija ġewwa l-Universita’ ta’ Malta fejn tittama li fi ftit snin oħra tkun gradwata bħala għalliema tal-Malti. Għandha għal qalbha l-poeżija u l-letteratura ta’ kull xorta; mhux biss kontemporanja iżda wkoll tradizzjonali. Fil-qasam poetiku, Leanne tikteb kemm poeżiji u kif ukoll versi liriċi. Fil-kamp artistiku, tgħożż ferm l-arti tal-kant, żfin u drama. Hija membru ta’ l-Għaqda Poeti Maltin.	Pinzellati ‘Il fuq u l’isfel mal-mixja taż-żmien, ħfief u safja tarahom kullimkien. Iserpu ‘tul kwadru tal-ħajja bla tmiem, jonfħu bla heda n-nifs dejjiem. Jitbewsu bil-ħerqa mal-mewġ żeffien, daqqiet oħra jbikku- suwed l-ilwien. Iż-żebgħa li tnixxi titkellem bla kliem, tferraħ u tnessi f’ żerniq il-jiem. Pinzellati f’moħħ esseri ħajjin, qatt ma jiċċaraw-qatt m’huma mejtin. FJURA Mal-medda tax-xmara, Kibru qrib żewġ fjuri żgħar. Qalb ħaxix kbir tara Ħdura tħaddar il-madwar. Jien fjura, Inti fjura, Flimkien negħlbu l-ħdura U ngħixu ħajja hienja. FIL-BANJU TAN-NANNA Fil-banju tan-nanna kont inċafċaf, kont nilgħab bla serħan u bla waqfien, bla nkwiet ta’ xejn fuq dak li għadu ġej. Hi tmellisni u tiċċajta. F’għajnejha kont nilmaħ l-imħabba, il-qalb tat-tieni omm. Bit-tjubija, tarani nindaf minn dawk il-ħwejjeġ li qatt ma tebbgħuni għax kont żgħira.