FUQ L-GHATBA TAT-TIELET MILLENNJU

Nistħajlek quddiemi baħar ta’ ramel

F’deżert Saħħari bħal dehbi l-lwien.

Harist madwari biex nilmaħ il-ħajja

Imma b’qalbi mnikkta ma rajtha mkien.

U rajt misteru fuq l-għoljiet ramlija

Fejn l-iġmla jbaħħru bil-qajla,bil-mod

U xejn ma nisma’ għajr ir-riħ ivenven

U waħdi jien nisfa’nħares fil-bogħod.

U nilmaħ l-oasi jħaddru bis-siġar

Fejn l-għatx itaffi bl-ilma dal-miskin

U nara l-iġmla ma’ sidhom għajjieni

Bil-pass jħaffu, lejn l-ilma resqin

Hekk jiena nistħajlu dana l-millennju

Mifrux quddiemi fil-baħħ tal-futur

‘mma qed nilmaħ l-oasi f’deżert qalbi

li hi t-tama ta’ ġejjieni mistur.

9/6/97

Din il-poeżija ġiet ikklassifikata t-tielet fil-Konkors Nazzjonali tal-Poeżiji 1997 imniedi mil-Għaqda Poeti Maltin.

IL-BIERAH, ILLUM U GHADA

U sebaħ jum il-bieraħ kollu msaħħab

U dehret dalma la’ lejla xitwija

Hassejt ir-ruħ titnikket, solitudini,

U vojt kbir ħassejt jidwi ġewwa fija.

  “Mma ‘llum telgħet ix-xemx fuq baħar ħiemed

w imliet is-sema bnazzi kollha dija.

Fetħet il-warda tfewwaħ ġewwa l-ġonna

W imliet madwari b’tama dejjemija

U jasal għada bil-ħorga misteru

Għax ma nafx x’hemm mistur għalik w għalija

”Mma ’nħoss li x-xemx se tiddi minn filgħodu

u terġa ġġib il-paċi ġewwa fija

Din hi ħajti bħall-bieraħ, illum w għada

Imżewqa kemm bil-morr u kemm bil-ħlewwa

”mma għalkemm in-niket jagħfas ġmielu fuqi

 it-tajjeb jirbaħ dejjem fuq id-dnewwa.

31/10/97