Karmenu Mallia twieled Ħal Qormi fid- 9 ta’ Nov.1929.Studja s-Seminarju, studja l-filosofija Franza; għandu l-BA Hons (Lond) fil-Franċiż, id-DLitt. fil-letteratura u l-ND fin-Naturopatija., diploma fil-Food Hygiene & Hotel Catering(Pariġi), Liċ. fl-Esperanto.

Hu president tal-Malta Esperanto-Societo, membru-fundatur ta’ l-Ghaqda Kittieba Esperantisti(Esperantista Verkista Asocio), membru ta’ l-Universala Esperanto-Asocio u membru ta’ l-Akkademja ta’ l-Esperanto; membru onorarju ta’ l-Għaqda Poeti Maltin.

Ħareġ ġabriet ta’ poeżiji bil-Malti, bl-Esperanto, bil-Franċiż u bl-Ingliż. Għandu rumanz bl-Esperanto bi sfond Malti.

Ippubblika diversi artikli bl-Esperanto fuq l-istorja u l-letteratura ta’ Malta  f’diversi  rivisti barra minn Malta. Għamel żewġ diskorsi fil-kungressi internazzjonali ta’ l-Esperanto:wieħed fuq l-istorja ta’ Malta f’Varsavja, Polonja(1987), u l-ieħor fuq il-letteratura Maltija f’Montpellier, Franza (1998). Fil-kungress ekumeniku internazzjonali bejn l-esperantisti kattoliċi u l-protestanti f’Rimini(2003) qara diskors fuq l-eżistenzjaliżmu ta’Dun Karm f’il-“Jien u Lilhinn Minnu”.

Artiklu tiegħu: ”De la interna ideo al homaranismo” (Mill-idea ġewwinija għall-umaneżmu), l-ideal li kellu Zamenhof, l-awtur ta’ l-Esperanto, inqaleb għar-Russu.

Jikkontribwixxi kull xahar artiklu bil-Malti ta’ natura kulturali f’waħda mill-gazzetta Maltija.

Għall-Malti mill-Esperanto qaleb a) il-ktieb ta’ avventuri tal-Jugoslav Tibor Sekelj:Kumewawa. u b) il-kors ta’ l-Esperanto, magħruf bħala l-“Kors ta’ Zagreb”. Ippubblika wkoll “Zamenhof”, il-ħajja ta’ l-awtur ta’ l-Esperanto.

Hu wieħed mit-tliet ġudikanti għall-konkors internazzjonali ta’ poeżija bl-Esperanto li tniedi kull sena l-Ass. Universali ta’ l-Esperanto.