IL-Kelma Tal-President

IL-KELMA TAL-PRESIDENT

Diċembru 2009

Is-sena li tinsab moribonda kienet waħda mill-aktar snin li tatna sodisfazzjon. Dan għax matulha kellna tant attivitajiet li wrew kemm l-Għ.P.M. hija ħajja.

Tellajna numru sabiħ ta' Lejliet ta' Poeżija f'lokalitajiet differenti, kellna fostna l-poetessa Taljana, Paola Mara De Maestri, organizzajna l-Konkors it-Torċa u għamilna żjara ta' kotesija mill-President ta' Malta, l-E.T. Dr George Abela LL.D. fil-Palazz, il-Belt. Dan kollu barra l-attivitajiet tas-soltu.

Il-ħasra hi, li mhux il-membri kollha jistgħu jħossu dan is-sodisfazzjon. Uħud jgħixu f'nagħas qawwi ta' apatija. Anqas jindenjaw ruħhom almenu jipparteċipaw fil-Konkors li norganizzaw kull sena! U xi ngħidu għall-ħlasijiet tal-miżati u l-abbonamenti fir-rivista Versi? Triq toqgħod tiġri warajhom u tibgħatilhom reminder wara l-ieħor!

Imma l-aħħar li tmut it-tama. Fi żmien bħal dan nagħmlu sew jekk inħarsu 'l quddiem. Is-sena d-dieħla l-Għaqda tagħlaq 35 sena. Il-Kumitat ġa ħejja xi pjani. Tgħid 'il-membri nsibuhom?

Xewqat sbieħ għall-Festi li ġejjin lill-Membri u lill-familji tagħhom.

ALFRED MASSA

Fuq - Top

IL-KELMA TAL-PRESIDENT

Settembru 2009

L-Għaqda Poeti Maltin dejjem kellha rispett lejn il-poeta għax hi tħares l-ewwel u qabel kollox lejn il-frott u mhux lejn is-siġra. Dan jista' jixhdu kulmin segwiha sa mit-twaqqif tagħha. Anzi, l-Għaqda tibqa' tirrispetta lill-poeta saħansitra wara mewtu; kif urew ċerti attivitajiet li organizzat biex tfakkar poeti li llum ħallewna, bla ma qagħdet tqis kinux membri tagħha jew le.

Mhux biss, imma l-Għaqda qatt ma ddiskriminat bejn sess u ieħor. Fil-fatt fil-lista tal-membri hemm kemm poeti maskili kif ukoll femminili; anki fil-Kumitat stess minn ħames membri, tnejn huma nisa. Biex dan jissaħħaħ, issa l-Kumitat iddeċieda li fost il-Membri Onorarji ad vitam jaħtar għall-ewwel darba poetessa.

Din hija s-Sinjura Lina Brockdorff. Ċertament, kulmin hu midħla tal-Letteratura Maltija xi darba jew oħra żgur li sema' b'Lina Brockdorff; poetessa, prożatura u persuna li tat sehem kbir f'diversi Għaqdiet tal-Malti, fosthom l-Għ.P.M., li ilha msieħba fiha għal ħafna snin. Biex turi r-rikonoxximent lejn il-ħidma letterarja tas-Sinjura Brockdorff l-Għaqda fi żmien qarib ser taħtarha uffiċjalment bħala Membru Onorarju ad vitam.

Jiena ċert li kulħadd jaqbel ma' dan il-pass. Fl-istess ħin jirrealizza kemm l-Għaqda tagħna tapprezza bis-serjeta' u bla ebda diskriminazzjoni l-ħidma ta' kulmin jagħti sehmu fil-qasam poetiku ta' pajjiżna.

Lil Lina, nifirħilha u nawguralha.

ALFRED MASSA

President

Fuq - Top

IL-KELMA TAL-PRESIDENT

Ġunju 2009

L-Għaqdiet tal-Malti għal xi żmien dehru jgħumu f'baħar imqalleb, tant hu hekk, li kien hemm minhom li għereq. Issa donnu li dak il-maltemp batta xi ftit, kif juru ċerti attivitajiet li qegħdin jiġu organizzati.

Minn maltemp bħal dan tista' tgħaddi wkoll l-Għaqda tagħna. Ma rridux inserrħu rasna żżejjed għax minn xahar għal xahar il-membri qegħdin jiżdiedu. Anqas għax naraw l-Għaqda ħawtiela f'diversi attivitajiet li torganizza.

Iċ-ċvetta dwar il-ġejjieni tinsab f'idejna lkoll. Importanti li nħallsu l-miżata regolarment; importanti li nabbonaw f'VERSI. Imma dan mhux biżżejjed. Irridu naraw aktar parteċipazzjoni mill-membri tagħna fid-diversi attivitajiet li norganizzaw. L-Għaqda għandha bżonn aktar membri "ħajjin"; trid tara aktar uċuħ ġodda. Mhux dejjem l-istess nies iwieġbu għas-sejħiet li tagħmlilhom.

Il-Kumitat talab lill-membri s-suġġerimenti tagħhom. Irċieva numru swostanzjali u fejn hu possibbli qiegħed jipprova jattwahom. Għalhekk wieħed ma jifhimx ir-raġuni ta' dil-bruda kollha. Irridu jew ma rridux li l-Għ.P.M. tibqa' ħajja u twettaq il-ġid lill-poeżija f'pajjiżna?

It-tweġiba li nistennew hemm bżonn tkun sostnuta bil-fatti, ħbieb!

ALFRED MASSA

President

Fuq - Top

l-KELMA TAL-PRESIDENT

Marzu 2009

Ma nistax ma nirringrazzjax lill-membri talli fl-aħħar Laqgħa Ġenerali għoġobhom jafdawli għal darb’oħra t-tmun tal-Għaqda tagħna. Dan huwa sinjal ta’ fiduċja u fl-istess ħin ta’ apprezzament għall-ħidma tiegħi u ta’ sħabi l-oħra li flimkien mexxejna l-Għ.P.M. fit-tliet snin li għaddew. Dan qed ngħidu, għax il-Kumitat għat-tliet snin li ġejjin kważi baqa’ li kien, b’tibdila waħda biss; dik ta’ Miriam Ellul minflok Alfred Calleja li għażel minn jeddu ma jikkontestax. Lil seħibna Alfred ngħidlu Grazzi minn qalbi għas-sehem li ta kemm dam fil-kariga ta’ PRO.

Kif għedt fid-Diskors tiegħi dakinhar tal-Laqgħa Ġenerali,l-Għ.P.M. bi ħsiebha tkompli t-triq li qabdet f’dawn l-aħħar snin. Ser inkomplu norganizzaw attivitajiet bil-għan li nressqu dejjem aktar lill-poplu tagħna lejn il-Poeżija. Nittama, li tul it-tliet snin li ġejjin il-membri se jkunu aktar attivi u jinkoraġġuna almenu bil-preżenza tagħhom fl-attivitajiet li norganizzaw.

Dan huwa wkoll l-ewwel Folju għal din is-sena. Talba ħerqana lill-membri biex flimkien inżommu ħajja r-rivista Versi minħabba li tinsab f’diffikultajiet finanzjarji. Abbonaw fiha u ħeġġu oħrajn jagħmlu l-istess. Versi mhijiex biss il-Leħen tal-Għ.P.M., imma hija wkoll il-Leħen ta’ dawk li għandhom għal qalbhom il-Poeżija Maltija.

ALFRED MASSA

President

Fuq - Top

l-KELMA TAL-PRESIDENT

Diċembru 2008

Bl-għajnuna t’Alla, wasalna fi tmiem sena oħra. Imma wasalna wkoll fi tmiem terminu ieħor ta’ tmexxija għall-Għaqda tagħna. F’Jannar li ġej, il-membri se jkollhom id-dritt li jagħżlu Kumitat ġdid għat-tliet snin li ġejjin. Hu dmir ta’ kull membru li dakinhar tal-Laqgħa ġenerali jattendi u jaqdi dmiru kif imiss.

Meta wieħed iħares lejn it-tliet snin li għaddew, ma jistax ma jħossx ċertu sodisfazzjon. L-attivitajiet li l-Għaqda organizzat juru kemm hi tabilħaqq ħawtiela fil-qasam letterarju (poetiku). Il-fatt, li ħafna minn dawn l-attivitajiet saru fuq stediniet minn Kunsilli Lokali u minn għaqdiet oħra, juri kemm l-Għ.P.M. hija apprezzata; kif jixhdu wkoll l-attentenzi li dejjem kellha.

L-unika weġgħa li ħalliet f’qalb l-Għaqda kienet l-apatija ta’ ċerti membri. Ħasra tassew! L-Għaqda għamlet minn kollox biex lil dawn it-talin tqajjimhom minn nagħas tagħhom, imma mhux dejjem irnexxielha. Grazzi minn qalbi lill-Kumitat li ħadem miegħi tul dawn it-tliet snin li għaddew. Fl-istess waqt Awguri sinċieri lill-Kumiat il-ġdid.

Sadattant, nixtieq lill-membri kollha: il-Festi t-Tajba!

ALFRED MASSA

President

Fuq - Top

Il-KELMA TAL-PRESIDENT

Settembru 2008

F'Lulju li għadda, l-Għaqda ppubblikat uffiċjalment it-tmien Antoloġija tagħha bl-isem I Silenzi della Montagna e le Voci del Mare / Silences of the Mountain and Voices of the Sea. Din ma kinetx l-ewwel darba li membri tal-Għaqda Poeti Maltin ingħaqdu ma' poeti barranin f'pubblikazzjoni simili.

Kienet esperjenza oħra, fejn l-Għaqda esportat f'pajjiż barrani l-poeżija Maltija kontemporanja; ukoll jekk il-versi tagħna kellhom ikunu bil-lingwa Ingliża.

Diżgrazzjatament, kif sikwit jiġri, is-suċċess ta' din l-Antoloġija aktar deher fl-Italja milli f'pajjiżna. Għax it-Taljani tawha importanza kbira f'diversi websites, Bloggs u saħansitra f'sezzjoni ta' l-istampa. Min-naħa tagħna, nistqarru li xtaqna ftaħna l-bieb għal aktar membri, kif ukoll użajna Lsienna flok wieħed barrani. Imma l-għażla ma kinetx f'idejna.

Jalla fil-futur qarib ikollna aktar okkażjonijiet simili. Ma ninsewx l-Antoloġija bl-Esperanto li għadna għaddejjin bit-tentattivi biex narawha stampata wkoll. Jalla l-membri tagħna japprezzaw bil-fatti dak li l-Għaqda qiegħda tagħmel għalihom.

ALFRED MASSA

President

Fuq - Top

Il-Kelma tal-President

Ġunju 2008

Fil-Folju preċedenti ktibt dwar il-website ta' l-Għaqda tagħna. Mhux biss urejt kif żvolġew l-affarijiet u rringrazzjajt lil min wellidha u lil min għadu jieħu ħsiebha, imma appellajt lill-membri tagħna biex minn żmien għal żmien ituha titwila.

Dan għamiltu primarjament biex il-membri jżommu ruħhom aġġornati dwar l-attivitajiet ta' l-Għaqda, imma wkoll biex fl-istess ħin ngħinu lill-Għaqda tiffranka ċerti spejjeż. Kien proprju għalhekk li ftit ilu tlabniekom ċerta informazzjoni marbuta b'mod partikolari ma' l-internet u ma' l-indirizz elettroniku.

B'hekk, ċerti Ċirkolarijiet, bħal dawk marbutin ma' Lejliet ta' Poeżija, eċċ., nistgħu ma nibagħtuhomx. Informazzjoni oħra, iva, l-Għaqda tibqa' tgħaddiha lill-membri kollha kif għamlet fl-imgħoddi. Ser nibqgħu nagħmlu hekk ukoll ma' min m'għandux la internet u lanqas indirizz elettroniku. Imma min għandu, ġentilment mitlub jgħarraf lis-Segretarju mill-aktar fis possibbli. Ta' dan, Grazzi bil quddiem.

Awguri għal Sajf ta' mistrieħ lil kulħadd.

ALFRED MASSA

Fuq - Top

IL-Kelma tal-President

Marzu 2008

Sa minn mindu ħadt f’idejja t-tmexxija tal-Għaqda fhimt l-importanza li din ikollha l-website tagħha. Għax importanti li l-Għ.P.M. timxi maż-żminijiet; kemm għaliha bħala Għaqda, kif ukoll għall-membri tagħha.

Grazzi għas-Segretarju Internazzjonali tagħna, Manwel Attard Cassar, fl-2003 il-ħ sieb tiegħi sar realta'. Aktar tard imbagħad, il-website għaddiet f’idejn il-membru ħabrieki tagħna, Raymond Grech, li aġġornaha u għadu jżommha ħajja sal-lum. Lil dawn iż-żewġ membri nirringrazzjahom minn qalbi.

Il-website www.ghpm.netfirms.com hija sabiħa, attraenti u informattiva. Faħħruha nies bla ebda konnessjoni ma’ l-Għaqda u l-fatt li sa llum fittxewha aktar minn 5,000 persuna ġa huwa sinjal pożittiv.

Nistaqsi: Int iżżurha? Tibgħat kummnenti jew poeżiji biex jidhru fiha? Minnha ssir taf l-attivitajiet li tkun organizzat jew ser torganizza l-Għaqda.

Ħaġa tajba li jkollok oġġett utli; imma x’jiswa jekk ma tagħmilx użu minnu? Dan japplika wkoll għall-website tagħna!

ALFRED MASSA

Fuq - Top

IL-Kelma tal-President
Diċembru 2007

Kulħadd jaf li minn Jannar li ġej Malta ser taqleb għall-munita Ewro. Mela, fil-ħlasijiet ta’ xiri u bejgħ ser jibdew jintużaw l-Ewro. Lilna din is-sistema tolqotna wkoll kemm fejn jidħlu miżati u kemm fejn jidħlu abbonamenti f’Versi.

Kif ġa ħabbarna fl-aħħar ħarġa ta’ IL-FOLJU (Sett.2007), il-miżata se tkun Lm2 (4.66Ewro) u l-abbonament f’Versi se jkun Lm1.50 (3.50 Ewro). Nittama li l-membri kollha jikkoperaw.

Nieħu l-opportunita’ biex infakkar li biex l-Għ.P.M. tibqa’ ħajja u tibqa’ tiffunzjona kif imiss, teħtieġ il-finanzi; u l-uniku dħul li għandha jiġi biss mill-miżati tagħna. Mela, ejjew nuru li aqħna kburin li ninsabu mseħbin f’din l-Għaqda u li rriduha tibqa’ ħajja fil-veru sens tal-kelma. Illum l-Għaqda tagħna kisbet rikonoxximent għal ħidmietha kemm f’Malta u kemm barra minn xtutna. Imma hemm bżonn li nħallsu l-miżata (u l-abbonament fir-rivista Versi) regolarment, ħalli ma jkunx hemm bżonn ta’ spejjeż żejda ta’ reminders mit-Teżoriera. Ta’ min jgħid, li kull Ċirkolari li tintbagħat tiswa lill-Għaqda aktar minn Lm7 (16.31 Ewro).

Nagħlaq billi Nawgura Milied hieni u qaddis, kif ukoll Sena Ġdida mimlija riżq, barka u ħidma lill-membri kollha u lill-familji tagħhom.

ALFRED MASSA

Fuq - Top

IL-Kelma tal-President
Settembru 2007

Bi pjaċir ninnutaw l-interess li bħalissa hawn f’pajjiżna fil-poeżija. Iżda minn dak li nisimgħu fil-Lejliet li minn żmien għal żmien norganizzaw f’diversi lokalitajiet, kif wkoll mill-poeżiji li jiġu f’idejna ma nistgħux ma ninnutawx ċerti għeltijiet.

Għalkemm naqblu ma’ dak li stqarr il-kittieb Taljan, Luigi Marbella. F’intervista fuq l-istazzjon televiżiv 2000 (29.08.2005) li hu diffiċli tiġġudika poeżija,min-naħa l-oħra, id-differenza fis-sustanza, kemm fil-ħsieb u anki fin-nisġa ġieli tinħass sewwa.

Jiena naħseb li kollox ġej min-nuqqas ta’ qari ta’ poeżiji stabbiliti, fosthom il-klassiċi. Dan isostnuh kritiċi bħall Mathew Arnold u T.S.Eliot. Nagħmlu żball jekk poeti bħal dawn inqisuhom bħala “m’għadhomx moda”!

Anzi minn hawn irridu nibdew, mit-taghlim tal-Prosodija, ħalli mbagħad wieħed jissokta jimxi ‘l quddiem. Jekk ma nagħmlux dan nibża’ li jista jiġrilna kif ġara fis-sittinijiet meta twieldu ħafna poeti li mietu f’qasir il-għomor.

ALFRED MASSA

Fuq - Top

IL-Kelma tal-President
Ġunju 2007

Jiena li kelli x-xorti nara l-Għ.P.M. titwieled u tul is-snin tissokta tikber u tiżviluppa, ma nistax ma nħossnix sodisfatt li llum naraha waslet fejn waslet.

Il-membri minn nofs tużżana qabżu d-90. L-Għaqdda għandha l-e-mail u l-website tagħha. Ippubbnlikat 7 Antoloġiji b'ilsna differenti u oħra bl-Esperanto li waslet biex toħroġ f'qasir żmien. Għandha r-rivista tagħha li toħroġ regolarment. Kull sena torganizza Konkorsi ta' Poeżija għall-kbar u għat-tfal. Tat ħajja ġdida lill-Poeżija fost il-poplu tal-gżejjer tagħna.

Dan kollu huwa frott ta' ħidma sfiqa ta' wħud mill-membri. Iżda ċertament m'huwiex biżżejjed għax min-naħa l-oħra, għandna membri oħrajn li jħossuhom kuntenti sempliċiment għax isimhom hu mniżżel fil-lista tagħna. Uħud anki biex iħallsu l-miżata rridu noqogħdu niġru warajhom!

Nistaqsi: Dawn jistgħu jiftaħru li huma membri veri tal-Għ.P.M.? Ħbieb tiegħi, għal min irid jaħdem fl-għalqa tagħna hemm xogħol għalih żgur.

ALFRED MASSA

Fuq - Top

IL-Kelma tal-President
Marzu 2007

Il-millennju, għalkemm ġab miegħu ġid f’diversi oqsma ta-soċjeta’- mhux biss Maltija – min-naħa l-oħra, donnu ta daqqa ‘l isfel lill-volontarjat. Jinħass li qed jerġa jerfa’ rasu l-materjaliżmu sfrenat imsejjes fuq il-marda kerha ta’ l-egoiżmu. B’hekk, qegħdin nassistu għal ċerta indifferenza u apatija f’bosta oqsma tal-ħajja.

Nibża’ li, jekk din il-marda tirfes anki l-għatba tal-Għaqda tagħna, allura jkun wasal iż-żmien li nkunu qbadna t-triq tan-niżla li tista’ twassal għall-qerda totali.

Kulmin għandu ftit melħ f’moħħu, jirrealizza li n-numri għandhom siwi limitat; hija kwalita’ li tgħodd. Għaliex qed ngħid dan? Għax il-fatt li, għall Grazzja t’Alla, illum l-Għ.P.M qabżet id-90 membru, jekk dawn il-membri ma jkunux attivi, ħawtiela u verament ħajjin, jiswew ftit wisq biex l-Għaqda tissokta timxi ‘l quddiem.

Jiena nitlob lill-membri jissuġġerixxu lill Kumitat x’għandu jagħmel biex jirnexxilu jlaqqa’ ħafna mill-membri flimkien. Għax sinċerament inħoss li f’dan ir-rigward almenu sal-lum fallejna.

ALFRED MASSA

Fuq - Top

Fiż-żmien meta s-sena tkun agonija, ma nistgħux ma nħarsux lura u naraw x’inkunu wettaqna. Min-naħa tagħha L-Għ.P.M. tħares b’sodisfazzjon lejn ħidmietha b’risq il-poeżija matul is-sena li għodda waslet biex tintemm.

Il-ħasra hi, li mhux kulħadd japprezza l-ħidma tagħha, bħal dak il-korrispondent li kiteb ittra fil-gazzetta The Times (26.07,2006). Nies bħal dawn juru kemm huma maqtugħin minn dak li jseħħ f’pajjiżna fil-qasam tal-poeżija. B’danakollu, xorta waħda jaslu li jippontifikaw dwar dak li qed isir u dwar dak li għandu jsir. Meta huma, wara kollox, anqas biss jindenjaw jattendu għal xi attivita’ marbuta ma’ dak li jiktbu dwaru.

Lilna l-kritika ma ddejjaqniex sakemm tkun justa sinċiera u kostruttiva. Aħna konxi li m’ħniex perfetti u li nistgħu naħdmu aktar, kif fil-fatt bi ħsiebna nagħmlu matul is-sena 2007. Iżda li niġu ttimbrata a static conglomeration of dummies ma nħossux li huwa just.Il-Festi t-Tajba lill-membri kollha u lill-familji tagħhom.