John Mallia

John Mallia

Dwar l-awtur

John Mallia twieled Ħal Qormi fis-7 ta' Diċembru, 1944. Għallem għal 41 sena fl-iskejjel statali, l-aħħar 18-il sena bħala għalliem tal-Malti fil-Liċeo Maria Regina, Blata l-Bajda. Huwa membru fl-Għaqda Poeti Maltin u fl-Għaqda Letterarja Maltija. Xogħlijiet tiegħu ġew ippubblikati fl-antoloġija Spirali (1997), fil-ġabra ta' poeżiji Arkadja (2004), f'rivisti u f'ġurnali.

Fis-Skiet

Fis-skiet,

nisimgħek miexi, hemm, maġenbi.

Int dejjem miegħi tkun.

Ma' l-ewwel dawl tal-għodwa

nisma' ġmiel leħnek

fit-tpespis ħelu tal-għasfur tal-bejt

li wara lejl mistrieħ

jagħtik kull ġieħ.

Nixref fit-tieqa, tbusni fuq ħaddejja

b'dawk xofftejk żiffa friska;

nara madwari f'mirja qtar ta' nida

l-ilwien sbieħ tal-ħolqien.

Il-kobor tiegħek jimla s-sema jżernaq

f'għodwiet sajfin, xitwin,

meta, 'il bogħod, fix-xefaq,

tfiġġ xemx sħuna sħuna

jew jisbaħ b'leħħ il-beraq u t-tkarwit.

Narak fil-għajnejn kollhom ferħ tat-trabi,

f'teptip għajnejn iż-żgħażagħ imfarfrin,

narak fejn hemm l-imħabba fil-familja,

fejn jitlissen il-kliem li jġib is-sliem.

Int dejjem miegħi tkun.

Nisimgħek miexi, hemm, maġenbi,

fis-skiet.

John Mallia

Quddiem Il-Mafkar

Lill-Mejtin Tat-Tieni Gwerra Dinjija

Semma' leħnek qanpiena,

ħallih jidwi mas-swar

u jinżel f'qiegħ il-baħar,

jogħla 'l fuq f'sema ċar,

jidħol f'sa l-ibgħad rokna

fejn jistrieħu fil-kwiet

eluf w eluf minn niesna

fis-saltna ta' l-imwiet.

Inġabru intom li temmnu

madwar dal-mafkar ġdid

għax ħutna jistħoqqilhom

li jgawdu magħna l-ġid

tal-ġmiel li jagħni 'l Malta

- din l-isbaħ realta' -

tal-ħajja li lkoll ngħixu

fis-sliem u l-liberta'.

U Waħdi Ma Nibqax

L-erba' ħitan madwari għadhom siekta

jixtarru l-kliem li semgħu fil-passat.

Tgħid għad jinsew kollox għal dejjem ...

jew xorbu, bejn il-fili torja,

il-manna minn ilsien il-bniedem

u beżqu 'l barra l-morr?

Imwennes mis-skiet li jgħannaqni,

ġo moħħi mitt ħsieb jimlieli ħini,

u dat-taħbiet ta' qalbi nħossu jtenni,

jaħraq daqs ġamar,

l-mħabba li ġarrabt.

U toħroġ minn għajnejja dik surtek sbejħa

biex timla dal-ħitan...

U waħdi ma nibqax!