ĦARIST

Ħarist 'l fuq...

Fil-ħemda u s-skiet

rajt żewġt ikwiekeb li bla kwiet

kienu jteptpu u jħarsu fix-xej'.

U ħsiebi ġerrej

dar fuqek... U qabbilt

t'għajnejk il-ħbub

mad-dawl irżin tal-kwiekeb

li bi ġmielhom jinfdu u jgħaxxqu l-qlub.

Ħarist fil-bogħod...

Ilmaħt fuq xefaq setgħan

lis-sema jitbewwes mas-sema kaħlan.

U deherli li smajt it-thewdin

tal-mewġ, li jilgħab fin fin fuq l-uċuħ

ta' l-ilma, li jleqqu fid-dawl ta' qamar fiddien.

U f'moħħi ġejt int...

U l-ħsejjes tal-mewġ

li jmellsu b'manjiera ġentili lill-baħar immens,

stħajjilthom bħal kliem mimli mħabba

li bħal wens,

nistenna li joħroġ minn fommok

biex lili jmellisni u jimlini

bit-tama ta' xefaq dejjiemi.

Ħarist madwari...

Smajt ta' l-arloġġ it-tektik bla serħan

li waħda war'oħra juri s-sigħat għaddejjin,

u 'l qalbi li għalik tħabbat bla waqfien

qabbiltha ma' l-arloġġ, li jheda fit-tekeik ta' kull ħin,

taħbit mgħaġġel ta' qalb ħerqana

li miġnuna w għatxana għal ħarstek u kliemek

li jġiegħlu lil Qalbi żżid fit-taħbit

xhieda ta' mħabbti qawwija Għalik.