Robert Gatt

Dwar l-awtur

ROBERT GATT twieled ir-Rabat, Għawdex. Ħa l-edukazzjoni Post-Sekondarja fl-iskola Sir Mikelanġ Refalo, fejn studja l-Matematika u l-Fiżika fil-livell avvanzat. Fil-preżent qiegħed jagħmel il-kors tal-Baċellerat fil-Komunikazzjoni u s-Soċjoloġija. Hu membru ta’ l-Għaqda Poeti Maltin, u membru fil-Bord Editorjali tal-pubblikazzjoni Il-Belt Victoria, u tal-gazzetta Insiter. Ippubblika diversi artikli u poeżiji, kif ukoll ħa sehem f’diversi lejliet ta’ poeżija, kemm dawk organizzati mill-Għaqda Poeti Maltin, kif ukoll f’dawk marbuta mal-Victoria International Arts Festival, li hu appuntament annwali marbut mal-festa ta’ San Ġorġ Martri, iċċelebbrata fil-Bażilika ta’ San Ġorġ tar-Rabat Għawdex.

LIZ-ZIJU PHILIP

Dalma li tifga, tal-ħajja, t-tbissima;

ġrajja li taħsad, tal-ħajja, r-rutina;

imrar li jixhed, tal-ħajja, in-nikta;

dulur li jħalli, tal-ħajja, is-sikta.

Għamad li jostor, tal-ħajja, s-sbuħija;

madmad li jtaqqal, tal-ħajja, t-tbatija;

mirra li tqarras, tal-ħajja, il-benna;

mitjar li jsarraf, tal-ħajja, il-Ġenna.

Xabla li toftom, lir-ruħ minn dal-ġisem;

miġja li ssejjaħ, lir-ruħ bl-ewwel isem;

prova li trebbaħ, lir-ruħ bl-ebda tebgħa;

żjara li minnha, ir-ruħ qatt tinħeba.

Kelma ta’ faraġ, lid-dinja bekkejja;

tama fil-premju, tal-ħajja li ġejja,

għax jekk il-mewt tnissel demgħa ma’ ħaddejna,

jekk tifridna minn ma’ min f’ħajtu ħabbejna,

hemm iżda d-dawl, li jdawwal dik id-dalma,

hemm il-ferħ li jxejjen dik it-trawma,

hemm il-fidi li tqawwina u ssabbarna…

Nota mill-awtur:

Din il-poeżija ġiet miktuba b’tifkira għażiża taz-ziju tiegħi, Philip Sammut, minn Birkirkara, li ħalla dan il-wied tad-dmugħ nhar l-4 ta’ Settembru 2005.

MARSALFORN

Kien lok tfuliti, tal-ferħ u l-hena bla minsusa;
kien tal-bidu x-xrara, tax-xewqa għall-imħabba;
kien għaxqiet ħolmieti, bjuda tat-tfulija;
kien tal-poeżija, il-muża fejn titrabba.

Illum hu l-manna li għosfrot, ma nġabritx;
hu l-ferħ bla temma, tebgħa fil-memorja
mkagħbra u mikula mill-mikrobu tal-marda dejjiema, terminali,
tas-saħta tax-xitan, l-ineżistenza t'Alla, it-tmiem ta' din l-istorja.

Illum ġrajja oħra.
orizzont sewdieni u drabi art vulkanika -
għalihom sfond in-namra ta' żegħil imkabbar,
għalija l-madmad tas-swied il-qalb, l-assenza tal-Veronika
li ma tqanqlitx minn surti msejkna, 'żda ħabirket biss
biex lil ta' min il-grazzja 'ngħatat mistħoqqa,
il-wiċċ daħkan tixxotta, mid-dmugħ tal-ferħ u
l-hena bla minsusa;

Biss fuq fommi l-mistoqsija

ta' min t'għajnejja d-dmugħ u dmija se jimblokka.

Jekk tkunx int, il-poeżija,
jekk tkunx int, Verġni Marija,
jekk tkunx int, Mulej, Sid tiegħi,
irrid biss li jimxu driegħi
fit-triq li hemm għalija,
sew jekk telgħa tat-tbatija,
sew jekk wita' ta' sbuħija,
qalbi qatt ma tnixxi d-dmija tat-telfien.

U l-imħabba ta' ġo fija,
f'dan il-lok ta' l-art Għawdxija
tibqa' b'bjuda qatt minsusa,
tibqa' sajma minn kull qrusa
illi tgħammar illum ġo Marsalforn -
fir-ramla ta' ġol-bajja, fin-nies mimlija ħajja,
u fl-ilmijiet u l-ħama tal-widien.

TAMA

X'ħin kont għadni nixxotta l-aħħar demgħa,

u x-xaba' mill-ħajja wasslitni f'trufijiet mudlama;

x'ħin qalbi solitarja għodda fgat fin-nuqqas t'Alla,

u leħħet għajnejja dbielet u battiet sa kważi-għama,

dehxa ħassejt - ħelwa, mellisija,

ma' ġismi għajjien, jikkontempla l-mewt u l-ħajja,

m'għadnix emarġinat, namrat tiegħi innifsi,

iżda sibt issa nikkondividi l-ġrajja.

Il-versi staġnati, il-poeżija morra,

il-qrusa tal-ħajja, l-aħħar demgħa ħamra,

it-togħma tal-velenu, il-ħsieb tas-suwiċidju,

ma tfewx sal-ġewwieni, id-dija ta' dil-ġamra.

Il-qalb wieqfa bdiet tħabbat, il-ħlejju nfirex

bħal kankru sabiħ li mewwet dak ta' qablu;

bħal Lażżru qomt, infaxxat bil-ġrieħi jintnu,

b'ħerqa għall-ħelsien mid-dlam ta' qabru.

Barra hemm id-dawl tax-xemx dejjiema -

ritmu mill-ġdid għat-taħbit tal-qalb għajjiena;

u t-tbissima t'Alla, il-bastun abjad ta' l-għama,

nisslet f'qalbi żewġ raġġi ta' tama.

KRIŻI TA' L-IMĦABBA

Tmewtu xofftejja u t-talba għall-għajjut intradmet

f'terrapien ġgantesk, li ħonoq 'l għadmi w laħmi;

spiċali l-ħin miżjud tal-logħba-ħajti ġa` telliefa,

spiċċali saħansitra l-qrusa tal-velenu xaħmi

li tul jiemi ta' swied il-qalb kien isostnini,

biex issa hemm biss xemx kiefra bajdanija

li bħal f'sajf etern ta' ħedla,

xejnet, ta' qalbi, l-imħabba waħdanija.

Għaliex il-kelma nixfet? Għaliex mietet l-imħabba?

Tgħid mhijiex din sejħa komuni?

U liema kliem, jekk mhux il-poeżija,

U liema mħabba, jekk mhux Ġesu` w Marija,

se jgħammru f'qalbi w ruħi u jsabbruni?

Ma nistax bil-passat nistabar;

ma nistax fil-futur nittama -

nista' biss nokrob għal elf darba

x-xewqa biex minn din ħajti naħrab ħarba

ħa ngawdi l-ġmiel tal-poeżija - ħlewwa w għana.

Iżda l-vulkan ġo fija rieqed, mhux estint -

id-demm staġnat, iżda jbaqbaq, lest li jfur;

dan laħmi, għalkemm kiebi, jaf jilbes qawet l-aqwa sur...

fija għad jerġa' jfiġġ il-ħlejju li fih dejjem emmint.